Şirvanda avtomobil piyadaları vurub, ölən və xəsarət alanlar var - VİDEO

Şirvanda avtomobil piyadaları vurub, bir nəfər ölüb, iki nəfər xəsarət alıb.

Yol-nəqliyyat hadisəsi səhər saatlarında Salyan-Şirvan yolunun Şirvan şəhəri "Köhnə şəhər" massivindən keçən hissəsində qeydə alınıb. Şirvan sakini, 23 yaşlı Murad Əsgərov minik avtomobili ilə hərəkətdə olarkən idarəetməni itirib və maşın yol kənarında dayanan piyadaları vurub.

Nəticədə Şirvan sakini, 68 yaşlı Vaqif Hüseynov hadisə yerində keçinib. Digər şəxslər - Sabirabad sakini, 42 yaşlı Samir Mehdiyev və Şirvan sakini, 53 yaşlı Vaqif Xudiyev Şirvan Şəhər Xəstəxanasına yerləşdiriliblər. Onlardan birinin vəziyyəti ağır olduğundan xəstəxananın reanimasiya şöbəsinə köçürülüb. Qəza zamanı hadisənin şokunu yaşayan sürücü də xəstəxanaya yerləşdirilib.

Faktla bağlı Şirvan Şəhər Polis Şöbəsində araşdırma aparılır.