AYNA və DİN-dən avtovağzalda REYD: qanunsuz sərnişin daşıyanlar, parklanma... - VİDEO - FOTO

- Tovuza 1 nəfər

- Bərdəyə 1 nəfər...

- Ağcabədiyə, Şəkiyə...

-  Bir nəfər lazımdır, çıxıram...

Bakı Beynəlxalq Avtovağzal Kompleksinin girişində özünə sərnişin axtaran sürücülərin səs-küyündən qulaq tutulur. Rayonlara getmək üçün avtovağzala gələnlərin qarşısını kəsməkdən belə çəkinməyən sürücülər xaotik bir mənzərə yaradıb.

Bu gün sözün həqiqi mənasında bu cür biabırçı vəziyyətə qarşı AYNA və DİN Binəqədi Rayon Polis İdarəsi əməkdaşları tərəfindən Bakı Beynəlxalq Avtovağzal Kompleski yaxınlığında reyd keçirilib. Avtovağzalın qarşısındakı yolun hərəkət hissəsində, “Qaraj”, “Körpünün yanındakı Servis”, “Avtovağzal metrosunun çıxışı”, “Şəki kafesi” adlanan ərazilərdə baş tutuan reyd zamanı  taksi və kiçiktutumlu digər avtomobilərlə qeyri-qanuni sərnişin daşıyan sürücülər saxlanılıb.

Avtomobilini yolun hərəkət hissəsində saxlayan sürücülər hərəkətin intensiv olduğu həmin ərazidə sıxlıq yaratmaqla yanaşı ictimai asayişi kobud şəkildə pozurlar. Bu isə avtovağzaldan hərəkət etmək istəyən vətəndaşların, xüsusən də  xanımların ciddi etirazına səbəb olur.

Reyd zamanı qanunsuz sərnişindaşıma ilə məşğul olan bəzi sürücülər barəsində cərimə tətbiq edilib. Nalayiq ifadələr işlədən, nəqliyyat vasitələrini avtovağzalın girişində, hərəkətə mane olan yerdə saxlayan sürücülər polis bölməsinə dəvət olunub. Onlar barəsində ictimai asayişi pozma, əmrə tabe olmamaq, təhqiredici ifadələr işlətmək haqqında akt tərtib edilib. Eləcə də qadağan olunmuş yerdə park edən sürücülər cərimələnib.

Nurlan Sakitoğlu

Nərmin Əkbər