Azərbaycanda yol kənarlarına yeni maarifləndirici lövhələr vuruldu - FOTO/VİDEO

Qeyri-Hökumət Təşkilatlarına Dövlət Dəstəyi Agentliyinin dəstəyi ilə "Yol hərəkəti təhlükəsizliyi: hüquqi yardım və maaifləndirmə” layihəsi "Jurnalistika və İnkişaf Mərkəzi" İctimai Birliyi tərəfindən tam icra olunub. Belə ki, layihə çərçivəsində hazırlanmış lövhələr Qeyri-Hökumət Təşkilatlarına Dövlət Dəstəyi Agentliyinin maliyə dəstəyi və Daxili İşlər Nazirliyinin Baş DYP İdarəsinin dəstəyi ilə patyaxt Bakı ilə yanaşı, regionları birləşdirən əsas yolların kənarlarına vurulub. Bakı-Şamaxı, Bakı-Qazax, Bakı-Astara istiqamətində olan yollara 5 maarifləndici lövhə yerləşdirilib. Həmin lövhələrdə sürət həddinin aşılmasına, yorğun və yuxusuz halda avtomobil idarə etməyin təhlükəli olmasına, piyadalar, velosipedçilər və mal-qaraya qarşı diqqətli olmağa dair çağırışlar əks olunub.

Maarifləndirici lövhələrdə sürücülərin həyat və təhlükəsizliyi üçün nəzərdə tutulmuş ifadələr və fotoşəkillər yer alıb. “Diqqət hər an qarşınıza çıxa bilər”, “Sürət həyatda uğur, yolda təhlükədir”, “Seçim sizin öz əlinizdədir”, “Yorğunluqdan və yuxusuzluqdan ölməyin!” şüarları həm piyadaların, həm də sürücülərin diqqətini cəlb etmək və sükan arxasında, yolu keçərkən ehtiyatlı olmağa hesablanıb.  

Qeyd edək ki, bu aksiya minlərlə insanın həyatının xilas edilməsində və qəzalardan qorunmağa faydalı olacaq.