Bakıda sürücüləri cərimə ilə üz-üzə qoyan yolayrıcı - VİDEO

Paytaxtın Bakıxanov prospekti ilə Səməd Vurğun küçəsinin kəsişməsində yolun daralması həm sıxlığa, həm də sürücülərin çaş-baş qalmasına səbəb olur. Avtosfer.az xəbər verir ki, sözügdən prospektdə (üzü “Dostluq” kinoteatrına gedən istiqamətdə) 4 hərəkət zolağı var. Ən sağdakı zolaq yalnız sağa, digər 3 zolaqdan isə düzünə hərəkət təşkil edilib. Lakin Səməd Vurğun küçəsinin kəsişməsindən sonra yol daralaraq 2 zolağa çevrilir. Orta zolaqla hərəkət edən sürücülər yol daraldıqdan sonra iki zolağın arasında qaldıqları üçün həm sağa, həm də sol zolağa yerdəyişmə edirlər. Bəzi sürücülər isə iki zolağın arası ilə gedərək qaydaları pozurlar. Belə olan halda isə istər-istəməz tıxac yaranır. Tıxacların ağırlaşmaması üçün isə həmin ərazidə daima yol polisi əməkdaşları xidmət aparır. Onlar çox vaxt sürücülərin əks istiqamətə çıxması üçün işarə verirlər və beləcə, Bakıxanov küçəsində axın sürətlənir.

Burada tıxacların qarşısını almaq üçün reversiv hərəkət təşkil edilməsi məqsədəuyğun hesab olunur. Qanunvericilikdə reversiv hərəkət nəzərdə tutulsa da, çox təəssüf ki, hərəkətin təşkili ilə məşğul olan qurumlar ehtiyac olan yollarda bunu tətbiq etmirlər. Yəni, Azərbaycanda hazırda reversiz yollar yoxdur.

Əgər Bakıxanov prospektində reversiz hərəkət təşkil edilərsə, yol polisi əməkdaşlarının da yolu nizamlamasına ehtiyac qalmayacaq. Günün pik saatlarında axın çox olan istiqamətə reversiv hərəkətlə əlavə zolaq ayrılarsa, sürücülərin rahat və fasiləsiz hərəkəti təmin ediləcək.

Elməddin