Bu küçədə qanunsuz parklanan avtomobillərə görə sıxlıq yaranır - FOTO

Nərimanov rayonu, Fəxrəddin Musayev küçəsində avtomobil əlindən tərpənmək olmur. Avtosfer.az-a izləyicilər tərəfindən göndərilən fotoda hər şeyi aydın şəkildə müşahidə etmək mümkündür. Ərazidə rəsmi ödənişli parklanma olmadığından sürücülər avtomobili necə gəldi saxlayaraq yolu bağlayırlar. Qanunsuz parkinqlərə isə dırnaqarası "parkinqçilər" nəzarət edir. 

Məsələ ilə bağlı Bakı şəhər Dövlət Yol Polisi İdarəsinin baş inspektoru Araz Əsgərli bildirdi ki, ərazi DYP-nin nəzarətindədir, əməkdaşlar tərəfindən gün ərzində küçəyə baxış keçirilir. Qanunsuz parklanan avtomobillər barəsində protokol tərtib olunur və onlarla maarifləndirici söhbətlər aparılır. 

Sürücülərin diqqətinə çatdıraq ki, qanuni parkinq olmayan yerlərdə avtomobil saxlayaraq digər sürücülərə çətinlik yaradırsınız, üstəlik həmin ərazidə hərəkət edən piyadaları təhlükə ilə üz-üzə qoyursunuz. 

Qeyd edək ki, belə hallarda sürücülər İnzibati Xətalar Məcəlləsinin 346.1-ci maddəsinə əsasən məsuliyyətə cəlb edilə bilərlər. 

Fərid