Bu küçədə sürücülər bilmədən hər gün qayda pozur: 60 manat cəriməsi var - VİDEO

Paytaxtın İnşaatçılar prospekti ilə Əbdürrəhim bəy Haqverdiyev küçəsinin kəsişməsində sürücülər qaydaları pozurlar. Bu barədə oxuculardan biri redaksiyamızın elektron ünvanına müraciət ünvanlayıb. Avtosfer.az xəbər verir ki, 10-cu keçid küçəsi adlanan yoldan sağa - İnşaatçılar prospektinə dönən sürücülər təhlükə ilə üzləşir. Belə ki, Ə.Haqverdiyev küçəsindən sola dönən sürücülər 10-cu keçid küçəsi adlanan yoldan sağa dönən sürücülərə yol vermirlər. Nəticədə sürücülər arasında anlaşılmazlıq baş verir. 

“Yol hərəkəti haqqında” qanunun 76-cı maddəsində qeyd olunub ki, svetoforun yaşıl işığında sola və ya geriyə dönən sürücü, qarşıdan düzünə və ya sağa gedən nəqliyyat vasitələrinə yol verməlidir. Buna görə  də sözügedən kəsişmədə Ə.Haqverdiyev küçəsindən sola – İnşaatçılar prospektinə (Dövlət Statistika Komitəsinə tərəf) dönən sürücülər qarşıdan sağa dönən sürücülərə yol verməlidir. Lakin həmin kəsişmədə müşahidə aparsaq, sola dönən sürücülərin yol vermədiyinin şahidi olarıq. Sürücülərin diqqətinə çatdırırıq ki, Ə.Haqverdiyev küçəsindən sola dönərkən 10-cu keçid küçəsindən gələn avtomobillərə yol vermədikləri halda cərimələnə bilərlər.

Nərminə Əli