Bu xətlərə aldanıb maşını park etməyin: Cərimə yazılır - VİDEO

Paytaxtın Aşıq Molla Cümə küçəsində sürücülər parklanma qaydasını kütləvi şəkildə pozurlar. Həmin sürücülərə qarşı yol polisi əməkdaşları mütəmadi olaraq inzibati məsuliyyət tədbirləri həyata keçirir. Parklanma qaydasını pozmağa görə cərimələnən sürücülərdən biri həmin ərazidən videogörüntü çəkərək Avtosfer.az-ın qaynar xəttinə göndərib. O bildirir ki, həmin küçənin sol tərəfində dayandığı üçün cərimə olunub: “Yolun sol tərəfində parklanmanı qadağan edən heç bir nişan yoxdur və asfalt üzərində parklanma üçün nişanlanma xəttləri çəkilib. Lakin avtomobili burada park edən zaman yol polisi əməkdaşları cərimə yazır. Bu, sürücülər üçün bir tələdir” – deyərək oxucu bildirib.

Qeyd edək ki, avtomobili yolun sol tərəfində park edən sürücülərin cərimə olunması tam qanunidir. Çünki yolun sol tərəfindəki nişanlanma xətti parklanmanı yox, təhlükəsizlik adacığını bildirir. Təhlükəsizlik adacığının üzərində parklanma isə qanunla qadağandır. Həmçinin hərəkət hissəsinin sol tərəfində dayanma-durma da qadağandır. Bunu bilməyən sürücülər orada parklanma qaydasını pozur və cərimə olunduqda isə günahı yol polislərində görür. Təbii ki, səsləndirilən ittihamlar tam əsassızdır. Həmin nişanlanma xətti tələ ola bilməz. Hərəkət zolaqlarını ayıran bu təhlükəsizlik adacıqları dünya təcrübəsində də mövcuddur. Ona görə də sürücülər qanunları öyrənməli və cərimə olunmamaq üçün qaydalara birmənalı olaraq əməl etməlidirlər.

Nərminə Əli