Bu yol sürücüləri təngə gətirib - VİDEO

Gəncə şəhərindən Samux rayonunun Qarayeri qəsəbəsinə gedən magistral yol illərdir ki, əsaslı təmir üzünə həsrətdir. Yoldan müntəzəm istifadə edənlər artıq təngə gəldiklərini deyirlər. Saysız-hesabsız çala-çuxurlar nəqliyyat vasitələrinə ziyan vurur.

Sürücülər 50 ildən artıqdır ki, istismarda olan Gəncə-Qarayeri yolundan narazıdır.

Yolun asfalt örtüyü yararsız vəziyyətə düşüb. Tez-tez kosmetik təmir aparılır, ancaq sürücülər nə yoldan, nə də başdansovdu təmirdən razıdırlar. Mövcud vəziyyət nəqliyyat vasitələrinin müxtəlif ehtiyat hissələrinin sıradan çıxmasına səbəb olur.

Yol əsaslı təmir edilməsə, Samux rayonunun bu yoldan istifadə edən 50 mindən artıq sakini eyni əziyyəti çəkməyə davam edəcək.

Məsələ ilə bağlı Azərbaycan Avtomobil Yolları Dövlət Agentliyinin mətbuat katibi Anar Nəcəfli bildirdi ki, yolun əsaslı təmirə ehtiyacı var. Məsələ dövlət proqramına salınıb. Maliyyə vəsaiti ayrılan kimi təmirə start veriləcək.