Çimərlikdə "avtoş"luq edənləri bu qədər cərimə gözləyir - VİDEO

Çimərlik ərazisində avtomobillərin hərəkəti insanların istirahətinə mane ola, hətta xəsarət almalara belə səbəb ola bilir.

Belə hadisələr dəfələrlə baş verib. Bu yaxınlarda çimərlik ərazisində avtoxuliqanlıq edilməsi hadisəsini də fakt kimi qeyd edə bilərik.

Sözügedən vəziyyət təbii ki, çimərliyə istirahət üçün gələnləri narahat etməyə bilməz.

BDYPİ-nin ictimai qurumlarla əlaqə şöbəsinin baş inspektoru Toğrul Nəsirli bu istiqamətdə nəzarət tədbirlərinin həyata keçirildiyini bildirir.

Toğrul Nəsirli onu da qeyd edib ki, bu cür hərəkətlərə yol verən şəxslər Azərbaycan Respublikasının İnzibati Xətalar Məcəlləsinin 511-ci maddəsinə əsasən, nəqliyyat vasitəsini idarə etmək hüququ bir il müddətinə məhdudlaşdırılmaqla beş yüz manatdan yeddi yüz əlli manatadək məbləğdə cərimə oluna bilər. Və ya onları  nəqliyyat vasitəsini idarə etmək hüququ bir il müddətinə məhdudlaşdırılmaqla on beş gündən bir ayadək müddətə inzibati həbs gözləyir. (APA TV)