“Gelandewagen”i mərcdə uduzdu: vertolyota bağlayıb göydən yerə atdılar - VİDEO

Rusiyanın Kareliya əyalətində iki Moskva sakini “Mercedes Gelandewagen” markalı avtomobili vertolyotdan aşağı atıblar. Avtosfer.az xəbər verir ki, hadisənin görüntüləri kamera vasitəsi ilə qeydə alınıb. Kadrlarda havada “Mİ-8” vertolyotuna “Mercedes Gelandewagen” markalı avtomobilin trosla bağlandığı və bir müddət irəlilədikdən sonra onu yerə atdığı görülür.

Yerli medianının məlumatına görə, buna səbəb paytaxt sakinlərinin bir-biri ilə bəhsə girməsi olub. Biri digərinə uduzub və Moskvada maşını hündürlükdən atmağa yer tapmadıqlarına görə, məcbur olub Petrozavodsk şəhərinə üz tutublar.

“Peskax” aeroportunun nümayəndəsinin sözlərinə görə, iki Moskva sakini vertolyotun 20 dəqiqəsinə 250 min rubl (6800 AZN) ödəyiblər. 1995-ci il istehsalı olan avtomobilin qalıqları daha sonra metal qəbulu məntəqəsinə təhvil verilib.

Nümayəndə həmçinin, “Belə qeyri-adi hadisə bizdə birinci dəfədir ki baş verir” sözlərini söyləyib.

Namiq Musayev