Lökbatan dairəsindəki xaos bitdi? - Vəziyyət indi necədir? - VİDEO

Bir neçə həftə əvvəl AYNA, DYP və digər qurumlar Lökbatan dairəsindəki xaosu aradan qaldırmaq üçün hərəkətə keçdi. İlk baxışdan nəticə qənaətbəxş oldu: Körpünün ətrafındakı xaos aradan qalxdı, hərəkət asanlaşdı. Amma...

2 gün əvvəl rayona getmək istəyərkən rastlaşdığım bəzi problemlər barədə qeyd etmək istəyirəm. Konkret olaraq, cənub bölgəsinə gedən avtobuslar demək olar eyni qayda ilə hərəkət edir, sadəcə olaraq dayanma yeri Binə Ticarət  Mərkəzinin qarşısına keçirilib. Bura qədəri əla. 

İşin digər tərəfi Qərb bölgəsinə gedən maşınların yığışdırılmasıdır. Bu hal mənim üçün sürpriz oldu. Amma vəziyyət başqa imiş. Sən demə orda-burda gizlənən maşınlar bir qədər fərqli qaydada “xidmət göstərir”. 

İş mexanizmi də çox sadədir: ora-bura gəzişən “konduktorlar” sərnişindən hara getdiyini soruşur. Qərb bölgəsinə gedənləri Binə Ticarət  Mərkəzinin ərazisində gizlənən mikroavtobuslara dəvət edir. Lakin bunu sərnişinlərə və ya sürücülərə yaxşılıq kimi qavramaq sadəlövhlük olar. Sürücü hər sərnişin üçün konduktora 1 manat ödəyir. Sənədsiz-sübutsuz yığılan pulların taleyi ilə maraqlanmaq vergi orqanının vəzifəsidir. 

Vəziyyətin belə olması Qaradağ və Səbail rayonlarından Qərb bölgəsinə gedənlərin işini çətinləşdirib. 

Cənub avtovağzalına nəzarətin gücləndirilməsinə ehtiyac var. Eyni zamanda qanunsuz və gizli sərnişindaşımanın qarşısı alınmalıdır. 

Vüqar Yaşaroğlu