Polisdən qaçmaq istəyən qarətçini itlər belə yaxaladı - VİDEO

Cənubi Afrikanın Kapskiy əyalətinin qərbində oğurluq edərək polisdən qaçan qarətçi, iki itin köməkliyi ilə yaxalanıb. Avtosfer.az xəbər verir ki, insident oktyabrın 28-də Qansbaae şəhərinin Berqa küçəsində baş verib.

Ərazi üzrə polis idarəsinin nümayəndəsi Andre Traut söyləyib ki, əməkdaşları Berqa küçəsində xidməti vəzifəsini yerinə yetirən zaman, əlində oğurluq əşyalarla qaçan bir şübhəli görüblər. Təqib zamanı qarətçi bir evin damına çıxaraq qaçmağa çalışıb. Lakin evin həyətyanı sahəsində iki itin olduğunu görüb dayanıb. Bir müddət ora-bura baxan və çıxış yolu tapa bilməyən qarətçi polisin də gəldiyini görərək özünü həyətə atıb.

Bundan sonra itlər ona hücum çəkiblər. İtlərdən qaçaraq qurtulmaq istəyən qarətçi, bir az sonra heydən düşərək yerə uzanıb. Bunu görən ev sahibi itləri şübhəlidən uzaqlaşdırıb.

Daha sonra polislər onu qandallayaraq əvvəlcə xəstəxanaya sonra da şöbəyə aparıblar.

Cinayətkarın hakim qarşısına çıxarılacağı gözlənilir.

Namiq Musayev