Sürücüləri çaşbaş salan nöqsan aradan qaldırıldı - FOTO

Xəbər verdiyimiz kimi, ötən gün paytaxtın 9-cu köndələn küçəsinin qurtaracağında quraşdırılmış işıqforlarda nasazlıq yaranmışdı. Belə ki, “Koroğlu” metrostansiyasından üzü 5 saylı Asan Xidmətə gedən istiqamətdə işıqforların qırmızı və yaşıl işıqları eyni anda yanırdı.

Daxili İşlər Nazirliyinin Nəqliyyatı İntellektual İdarəetmə Mərkəzindən Avtosfer.az-a məlumat verilib ki, qeyd olunan ünvanda işıqforun elektrik naqilində qısaqapanma nəticəsində texniki problem yaranıb. Qurumun İctimaiyyətlə əlaqələr sektorunun aparıcı mütəxəssisi Ömər Xıdırov bildirib ki, NİİM-in əməkdaşları əraziyə baxış keçiriblər və problem qısa vaxt ərazində həll edilib.

Qeyd edək ki, belə problemlərlə qarşılaşan vətandaşlar NİİM-in (012 404 41 22) və Avtosfer.az-ın qaynar xəttinə (055-335-15-59) müraciət edə bilərlər.

Nurlan Sakitoğlu