"Etimad quruculuğu nəqliyyat dəhlizləri boyunca da bərqərar olmalıdır" - Nazir müavini

Əlaqələrin və münasibətlərin daha da möhkəmlənməsinin şahidi olacağıq. Əlbəttə, çox gözəl anlayırıq ki, biz sahələrarası əməkdaşlıqdan, rəqəmsal sistemlərdən və nəqliyyat sistemlərindən danışırıq, ümumi mühitdə baş verən hadisələrin vahid mərkəzdən əlaqələndirilməsinin vacibliyini vurğulayırıq.

Avtosfer.az xəbər verir ki, bunu Azərbaycanın rəqəmsal inkişaf və nəqliyyat nazirinin müavini Saməddin Əsədov oktyabrın 1-də Bakıda keçirilən “Qütbləşmiş dünyada media vasitəsilə etimadın qurulması” mövzusunda Media Forumunda çıxışı zamanı deyib.

Etimad quruculuğu tədbirlərinin vacibliyindən danışan nazir müavini əlavə edib: “Bu tədbirlər bilavasitə nəqliyyat dəhlizləri boyunca da öz əksini tapmalı və bərqərar olmalıdır. Çünki bu baxımdan iqtisadi inteqrasiyanı daha da dərinləşdirəcəyik. Ölkələrimiz arasında olan münasibətləri daha yüksək səviyyəyə qaldırmaq imkanı əldə edəcəyik. Bu isə bizim üçün vacib məsələdir. Çünki irəli sürdüyümüz çoxşaxəli təşəbbüslər var və onların gerçəkləşməsi olduqca vacibdir”.

Saməddin Əsədov qeyd edib ki, vacib məsələlərdən biri məlumatların qorunması, əməliyyatlar sahəsində kibertəhlükəsizliklə bağlı təcrübə mübadiləsinin aparılmasıdır. Nəqliyyat dəhlizlərinə gəldikdə isə, bu sahədə əməkdaşlığın təmin edilməsi mühüm əhəmiyyət daşıyır.