Sənəd saxtalaşdırılmasında adı hallanan şirkətə 272 min manatlıq tender

Azərbaycan Tibb Universiteti (ATU) “Kaspian Standart” MMC ilə 272 642,54 manat məbləğində satınalma müqaviləsi bağlayıb.

Avtosfer.az xəbər verir ki, müqavilə universitetin mətbəəsi üçün lazım olan avadanlıqların və materialların alınmasını nəzərdə tutur.

İqtisadiyyat Nazirliyi yanında Dövlət Vergi Xidmətinin reyestr məlumatlarına görə, “Kaspian Standart” MMC 17 mart 2008-ci ildə qeydiyyata alınıb. Şirkətin nizamnamə kapitalı 10 manatdır. Hüquqi ünvanı Bakı şəhəri, Yasamal rayonu, akademik Şamil Əzizbəyov küçəsi, ev 95-də yerləşir. MMC-nin qanuni təmsilçisi Nəsrullayev Fuad Nazim oğludur.

Şirkətin fəaliyyət sahəsi kifayət qədər geniş olsa da, açıq mənbələrdə onun fəaliyyəti haqqında geniş məlumatlara rast gəlinmir. Şirkətin maddi-texniki bazası, əməkdaşlarının sayı və həyata keçirdiyi layihələr barədə də ictimaiyyətə açıq ətraflı məlumat yoxdur.

Dövlət satınalmalarının vahid elektron portalı üzərindən aparılan araşdırma zamanı məlum olub ki, “Kaspian Standart” MMC müxtəlif dövlət qurumlarının keçirdiyi satınalma müsabiqələrinin qalibləri sırasında yer alıb.

Şirkət müxtəlif vaxtlarda inşaat işləri, kitab, dəftərxana və təsərrüfat mallarının alınması, regionlarda insan alveri probleminin sosial-psixoloji aspektlərinin öyrənilməsi, səbəblərinin müəyyənləşdirilməsi, həmçinin yetkinlik yaşına çatmayanlar arasında narkotik və psixotrop maddələrdən istifadə dərəcəsinin qiymətləndirilməsi ilə bağlı araşdırma və təhlillərin aparılması kimi fərqli satınalma predmetləri üzrə müqavilələr əldə edib.

2022-ci ildə “Kaspian Standart” MMC-nin adı dövlət satınalmaları ilə bağlı sənədlərin saxtalaşdırılması məsələsi üzrə yayılan məlumatlarda da hallanıb. (qaynarinfo)