Avtomobildə yemək yeməyin hansı təhlükələri var - EKSPERTLƏRDƏN XƏBƏRDARLIQ

Avtomobildə yemək yemək, bir çox sürücü üçün vaxt çatışmazlığı və ya fövqəladə hallarda rahat bir çıxış yolu kimi görünə bilər. Lakin mütəxəssislər bu vərdişin sağlamlıq baxımından ciddi risklər daşıdığını bildirir.

Avtosfer.az xəbər verir ki, sağlamlıq üzrə mütəxəssis Şivram Sinqh avtomobildə yemək yeməyin qida zəhərlənməsi və digər sağlamlıq problemləri riskini artırdığını qeyd edib:

“Avtomobildə qidalanmaq və ya yemək saxlamaq çox vaxt qırıntıların ətrafa səpələnməsinə və dağınıqlığa səbəb olur. Bunlar düzgün təmizlənmədikdə bakteriya, kif və hətta zərərvericilərin yaranmasına şərait yaradır”.

Xüsusilə yay aylarında yüksək temperatur bakteriyaların sürətlə çoxalmasına səbəb olur. Salmonella və Listeria kimi bakteriyalar 40°F-140°F (təxminən 4°C-60°C) temperatur aralığında daha tez inkişaf edir ki, bu da qapalı avtomobillərin daxili istiliyinə uyğundur.

Chester Universitetinin tibb elmləri üzrə müəllimi Qaret Nyenin araşdırmasına əsasən, avtomobilin yük yerində təxminən 1500 növ bakteriya mövcuddur. Bakteriyalar sürücü oturacağı, ötürücü qolu, alət paneli və sükan kimi yerlərdə də geniş yayılır. Mütəxəssislər avtomobildə yemək yeməyə məcbur olan sürücülərə avtomobillərini mütəmadi və diqqətlə təmizləməyi tövsiyə edir. Əks halda, bu vərdiş qida yoluxucu xəstəliklərə, hətta qida zəhərlənməsinə səbəb ola bilər.

Eltac Zülfüqaroğlu