Duracağa əsassız gətirildiyini deyən sürücü ilə bağlı DYP-dən açıqlama: Etibarnaməsiz olub və... - FOTO

Yasamal rayonu ərazisində avtomobili duracağa yerləşdirilən sürücü sosial şəbəkədə videogörüntü paylaşaraq, baş verən hadisə ilə bağlı narazılığını ifadə edib. O, idarə etdiyi 77-AX-327 qeydiyyat nişanlı "Khazar" markalı avtomobilin yol polisi əməkdaşları tərəfindən heç bir səbəb olmadan duracağa aparıldığını iddia edir.

Məsələ ilə bağlı Bakı şəhər Dövlət Yol Polisi İdarəsində araşdırma aparılıb. İdarənin baş inspektoru, polis baş leytenantı Rüstəm Əhmədli məsələ ilə əlaqədar Avtosfer.az saytının sorğusuna cavab verib. O bildirib ki, sürücü Hüseynov Fərid Cavanşir oğlunun iddiaları əsassızdır.

Araşdırma zamanı müəyyən edilib ki, yol polisi əməkdaşları sürücünü qanuni əsaslarla saxlayıb. Sürücü nəqliyyat vasitəsini idarə edərkən etibarnaməsi olmayıb. Bundan əlavə, həmin avtomobilin yol hərəkəti qaydalarının pozulmasına görə üzərində ödənilməmiş cərimə borcu olub.

R.Əhmədli qeyd edib ki, bu cür hallarda mövcud qanunvericiliyə uyğun olaraq avtomobilin duracağa yerləşdirilməsi tam qanunidir. Sürücü cərimələri ödədikdən və müvafiq sənədləri qaydasına saldıqdan sonra avtomobilini duracaqdan götürə bilər.