Əks yola çıxaraq 150 manatlıq qayda pozan sürücü QƏZA ŞƏRAİTİ YARATDI - VİDEO

Paytaxtın mərkəzi küçələrinin əksəriyyətində sürücülərin pozduğu qaydalar quraşdırılan xüsusi texniki vasitə, kamera ilə qeydə alındığı üçün bu ərazilərdə qismən də olsa, yol hərəkəti qaydaları sürücülər tərəfindən gözlənilir. Lakin paytaxtətrafı, eləcə də mərkəzdən kənar ərazilərdə belə kameralar olmadığı üçün sürücülər də qaydalar mövzusunda əhli-kef davranır.

Avtosfer.az xəbər verir ki, paytaxtın Binəqədi rayonunda qanunazidd ötmə əməliyyatı yerinə yetirən sürücü digər nəqliyyat vasitələri üçün də qəza şəraiti yaradıb.

Belə ki, rayonun 28 May küçəsində işıqfordan sola, yəni Balaxanı yoluna dönmək istəyən sürücüyə onun solundan  ötmə əməliyyatı edərək işıqforda düzünə davam edən sürücü maneə yaradıb. 99-UL-403 qeydiyyat nişanlı “Mercedes” markalı avtomobilin idarəçisi əks yola çıxaraq ötmə əməliyyatı edib. Üstəlik, sürücünün yanında əyləşən sürücü qanun pozuntusunun üzrxahlığını, icazəsini istəyirmiş kimi əlində siqaret işarə də verib.

Qeyd edək ki, yol hərəkəti qaydalarını bu cür pozan sürücülər İnzibati Xətalar Məcəlləsinin 327.4-cü maddəsinə əsasən, 1.1, 1.3 və 1.11 üfüqi nişanlanma xətlərinin tələblərini pozmaqla nəqliyyat vasitəsini tam olaraq əks istiqamətli nəqliyyat axınının hərəkət zolağına keçirərək nəqliyyat axınına əks istiqamətdə hərəkət etməyə görə 150 manat və əlavə olaraq 4 balla cərimələnir.

Səfər