Qanundan xəbəri olmayan sürücü: Yolu kəsib özünə haqq qazandırdı - VİDEO

Qanundan xəbərsiz sürücü yolda hərəkəti çətinləşdirib. Avtosfer.az xəbər verir ki, hadisə Xırdalan şəhəri Mehdi Hüseynzadə küçəsində qeydə alınıb.

Belə ki, 77-BG-545 qeydiyyat nişanlı "KIA" markalı avtomobilin sürücüsü tıxac olduğunu görərək yolayrıcına daxil olub. Bu zaman sağdan gələn nəqliyyat vasitələrinin yolunu kəsərək onların keçib getməsinə maneə yaradıb.

Görüntünü qeydə alan sürücü işıq siqnalı ilə narazılığını bildirən zaman, həmin sürücü əl hərəkətləri ilə "hara sürüm, görmürsən tıxacdır?" deyərək özünə haqq qazandırıb.

"Yol hərəkəti haqqında" qanunun 75-ci maddəsində qeyd olunub ki, əgər yolayrıcında və ya hərəkət hissələrinin kəsişməsində tıxac yaranıbsa və bu sürücünü dayanmağa məcbur edərək digər nəqliyyat vasitələrinin hərəkəti üçün maneə yaradacaqsa, sürücünün belə yolayrıcına və ya kəsişmə yerlərinə girməsi qadağandır.

Qeyd edək ki, bu qayda pozuntusunun törədilməsinə görə, İnzibati Xətalar Məcəlləsinin 327.2-ci maddəsilə 3 bal 100 manat məbləğində cərimə nəzərdə tutulub.

Fərid