Şəhərin mərkəzində bahalı avtomobillərini harada gəldi parklayan sürücülər - FOTO

Paytaxtın mərkəzi küçə və prospektlərində sürücülərin yol hərəkəti qaydalarını gözardı edərək hərəkətə maneə yaratma faktlarına hələ də rast gəlmək mümkündür.

Avtosfer.az xəbər verir ki, Bakının Səbail rayonunda Mirzə Fətəli Axundov bağı kimi tanınan parkın ətrafındakı yollarda nəqliyyat vasitələri idarəçilərinin dayanma-durma qaydalarını kobud şəkildə pozması ərazidə gün ərzində nəqliyyat sıxlığının yaranması ilə yanaşı, piyadaların hərəkətini də məhdudlaşdırır.

Belə ki, rayonun Lermontov küçəsində 99-DB-513 qeydiyyat nişanlı “Chevrolet”in sahibi piyada keçidinə 5 metr məsafədə avtomobili park edib və ərazidən uzaqlaşıb. Eyni küçədə 10-ZT-085 qeydiyyat nişanlı “Range Rover” markalı avtomobilin sürücüsü isə nəqliyyat vasitəsini daynma-durmanın qadağan edildiyi hissədə saxlayıb.

Əhməd Cavad küçəsində isə 10-LY-767 nömrəli “BMW” və 77-LC-012 nömrəli “Chevrolet” markalı avtomobillərin sahibləri isə sanki ərazi onların şəxsi mülkiyyəti imiş kimi “zebra”nı parklama yeri kimi özəlləşdiriblər.

Qeyd edək ki, xəbərdə nəzərdə tutulan dayanma-durma qaydalarını pozan sürücülərin hər biri İnzibati Xətalar Məcəlləsinin 346.1-ci maddəsinə əsasən, 20 manat məbləğində cərimə edilə bilər.

Səfər