Şəhərin mərkəzindəki küçənin bağlanmasından sui-istifadə edən sürücülər – FOTO

Son dövrlər Azərbaycan Yerüstü Nəqliyyat Agentliyinin və DYP-nin gördüyü işlərin müsbət nəticəsi kimi paytaxtda mikromobilliyin inkişafı istiqamətində müsbət nəticələrə nail olunub. Lakin bu nailiyyətlərin üzərinə bir də sürücülərin şəhərin nəqliyyat infrastrukturuna vurduğu zərərlər vətəndaşların narazılığına səbəb olur.

Avtosfer.az xəbər verir ki, Bakıda COP29 tədbiri ərəfəsində, daha dəqiq desək, oktyabrın 27-dən etibarən “Qoşa qala qapıları”nın qarşısına irəliləyən İstiqlaliyyət küçəsi, sonrasında qalanın divarları boyu irəliləyən Əziz Əliyev küçələrində avtomobillərin hərəkəti dayandırlıb. Yalnız sakinlərin həmin istiqamətdə hərəkətinə şərait yaradılıb. Lakin küçədəkə son günlərdə yaranan vəziyyət vətəndaşların narazılığına səbəb olub.

Belə ki, Səbail rayonu Əziz Əliyev küçəsində ərazidə yaşayan şəxslərdən başqa hansısa fərdi avtomobilin hərəkətinə icazə verilmədiyi halda ərazidə yaşayan sürücülər eyni zamanda bir neçə qaydanı pozur. Nəqliyyat vasitələrinin idarəçilərinin qanunazidd əməllərinin fotoları sosial şəbəkələrdə yayılıb və müzakirələrə səbəb olub.

90-YK-738 qeydiyyat nişanlı “Mitsubishi” və “Mercedes” markalı avtomobillərin idarəçiləri nəqliyyat vasitələrini velosiped zolağının üstündə parklayıb. Digər tərəfdən ara məhəllələrdə parklamaq üçün kifayət qədər yer olduğu halda, sakinlər avtomobillərini yolun hər iki tərəfində saxlamağı üstün tutublar.

Həm velosiped sürücüləri, həm də ərazidə yaşayan digər vətəndaşlar aidiyyəti qurumlar tərəfindən Əziz Əliyev küçəsindəki vəziyyətin nəzarətə götürülməsini xahiş edir.

Səfər