Tranzit nömrəli maşın sürən sürücülər radara düşmür? - VİDEO

Bir çox sürücü hesab edir ki, tranzit nömrə ilə idarə edilən avtomobillər nə radarlara, nə də müşahidə kameralarına düşür. Onların fikrincə, bu cür avtomobillərlə törədilən yol hərəkəti qaydası pozuntularına görə inzibati cərimə tətbiq edilmir. Lakin qanunvericilik və texniki sistemlər bu fikrin doğru olmadığını göstərir.

Azərbaycan qanunvericiliyinə görə, tranzit nömrələr daimi dövlət qeydiyyat nişanı olmasa da, müvəqqəti qeydiyyat nişanı hesab olunur. Bu nişanlar avtomobilin rəsmi qeydiyyata alınana qədər istifadəsinə imkan yaratmaq məqsədilə verilir. Ən əsası isə həmin nömrələr də daimi qeydiyyat nişanları kimi mərkəzi informasiya bazasına daxil edilir.

Bu baxımdan, tranzit nömrəli avtomobillərlə törədilən qayda pozuntuları da xüsusi texniki vasitələr — radar və müşahidə kameraları tərəfindən qeydə alınır. Qanun pozuntusu aşkarlandıqda, digər avtomobillərdə olduğu kimi, sürücü barəsində elektron protokol tərtib edilir.

Yəni, tranzit nömrələrin radara düşmədiyi barədə sürücülər arasında yayılan fikir reallığı əks etdirmir.

Fərid