Yaponiya zəlzələlərlə necə mübarizə aparır? - Davamlılığın sirri

Sakit okeanın “od halqası” üzərində yerləşən Yaponiya hər il yüzlərlə zəlzələ ilə üzləşsə də bu təbii fəlakətlərə qarşı qurduğu sistemlə dünyaya nümunə olmağa davam edir. Ölkənin uğurunun arxasında isə təkcə müasir texnologiya deyil, həm də illərlə formalaşmış qaydalar və ictimai hazırlıq dayanır. Avtosfer.az Sfera.az-a istinadən xəbər verir ki, 1923-cü ildə baş verən Böyük Kanto zəlzələsi və 1995-ci ildəki Kobe zəlzələsi kimi faciələrdən sonra tikinti normaları köklü şəkildə sərtləşdirilib. Bu gün ölkədə inşa edilən bütün binalar seysmik izolyasiya sistemləri ilə təchiz olunur. Xüsusi amortizatorlar və elastik konstruksiyalar sayəsində göydələnlər sarsıntıya müqavimət göstərmək əvəzinə onunla “hərəkət edir”.

Paytaxt Tokioda yerləşən "Tokyo Skytree" bu texnologiyanın simvolu hesab olunur. Ənənəvi memarlıqdan ilhamlanan quruluşu sayəsində güclü zəlzələlərə belə davam gətirə bilir.

Texnoloji infrastruktur da eyni səviyyədə inkişaf edib. Şinkansen qatarları zəlzələni əvvəlcədən hiss edən sensorlarla təchiz olunub və təhlükə zamanı avtomatik dayanır. 2011-ci ildə baş verən Tohoku zəlzələsi zamanı bu sistem yüzlərlə insanın həyatını xilas edib.

Bundan əlavə, ölkədə saniyələr öncə xəbərdarlıq edən erkən siqnal sistemi fəaliyyət göstərir. Mobil telefonlara göndərilən bu siqnallar insanlara təhlükəsiz mövqe tutmaq üçün kritik vaxt qazandırır.

Yaponiyanın uğurunun əsas səbəblərindən biri də cəmiyyətin hazırlığıdır. Məktəblərdə mütəmadi təlimlər keçirilir, hər evdə fövqəladə vəziyyət çantası saxlanılır. Bu yanaşma texnologiya ilə insan faktorunun vəhdətini təmin edir.

Beləliklə, Yaponiya zəlzələlərlə mübarizədə yalnız mühəndislik deyil, intizam, təhsil və kollektiv məsuliyyət modeli ilə də seçilir. Bu sistem sayəsində ölkə ən güclü təbii sınaqlardan belə minimum itki ilə çıxmağı bacarır.