Azərbaycanda avtomobillər niyə tez sıradan çıxır? - Benzin, yoxsa başqa səbəblər var?

Son günlər sürücülər Avtosfer.az-a şikayət edərək “Aİ-92" markalı benzinin keyfiyyətinin aşağı olması səbəbindən avtomobilin mühərikində problemlərin yarandığı, müxtəlif səslərin gəldiyini bildirirlər. Sürücülər deyir ki, avtomobillə bir neçə kilometr məsafə qət etdikdən sonra mühərrikdə titrəmələr yaşanır və avtomobilin sürət götürməsində problem yaranır.

Avtosfer.az məsələ ilə bağlı araşdırma aparıb. Ekspertlər hesab edir ki, benzinin keyfiyyət məsələsində o qədər də dəyişiklik yoxdur.

Ümumiyyətlə götürəndə əksər hallarda Azərbaycanda istehsal edilən yanacağın keyfiyyəti ilə bağlı müəyyən narahatlıqlar ortaya çıxır. Bu da ondan qaynaqlanır bir sıra hallarda yerli nəzarət qurumları öz fəaliyyətini effektiv təşkil etmirlər. Yaxud da hansısa formada bu məhsulların keyfiyyətinə davamlı nəzarəti təmin etmirlər. Nəticədə müəyyən müddətdən sonra istehsal prosesində texnoloji avadanlıqların keyfiyyətinin dəyişilməsi və ya məsuliyyətsizlik nəticəsində nöqsanlar ortaya çıxır. Yaxud da istehsaldan sonrakı prosesdə, yəni birbaşa olaraq pərakəndə satış məntəqələrində hansısa formada daha çox mənfəətin əldə olunması məqsədilə digər qatqılardan, daha aşağı oktanlı yanacağın qarışığı təklif edilir. Nəticədə isə vətəndaşlar yanacağın keyfiyyətindən şikayətlənirlər.

Avtomobil ustaları isə bunun səbəbini başqa amillərdə görür. Ustalar deyir ki, son aylarda avtomobil yağlarının qiyməti xeyli artıb. Ona görə də sürücülər, məsələn, yanacaq filtrini 5 min kilometrdən bir dəyişmək əvəzinə, 10 min kilometrdən sonra dəyişir. Yağı da eyni 5 min yox, 8 min kilometrdən sonra dəyişirlər. Bütün bunlar da problemlər yaradır.

Orxan