"Bakı şəhərinin yol infrastrukturu tab gətirmir" - NƏQLİYYAT EKSPERTİ AÇIQLADI

“ Küçə və prospektlərdə nəqliyyat axını çoxdursa bunu mütləq şəkildə tənzimləmək lazımdır. Bunun üçün yol polisi əməkdaşları artıq gücləndirilmiş iş rejimində çalışırlar. Onlar hərəkətin tənzimlənməsini həyata keçirdirlər”. Bu fikirləri SİA-ya açıqlamasında nəqliyyat eksperti Elməddin Muradlı bildirib.

Nəqliyyat eksperti qeyd edib ki, bəzi məsuliyyətsiz valdeyinlər məktəbin ətrafında harda gəldi saxlayırlar: “Bu da nəqliyyatı iflic vəziyyətinə salır. Bunun üçün bəzən valdeyinləri də qınamaq olmur. Amma hansısa bir formada çıxış yolu olmalıdır. Avtobusların sayının artırılması vacibdir. Uşaqların yalnız yaşadıqları ərazi üzrə məktəbə qəbulu önəmlidir. Misal olaraq Yasamal rayonu ərazisində yaşayan uşaq Səbail rayonunda, Bayıl qəsəbəsində, Binəqədidə məktəbə gedirsə o zaman təbii ki, həmin şagirdin məktəbə getməsi üçün nəqliyyat lazımdır. İctimai nəqliyyatda bərbada vəziyyətdə olduğu üçün valideyin artıq məcbur qalıb avtomobil alır və ya taksi tutur. Belə olduğu halda da ölkədəki nəqliyyat intensivləşir. Bakı şəhərində də yol infrastrukturu elədir bu qədər nəqliyyat axınına dözmür. Bu gün 1 milyon 500 min avtomobil nəqliyyat vasitəsi Azərbaycanda qeydiyyatdadır. Onun 800 mini bakı şəhərinin payına düşür, 600 mini isə rəsmi qeydiyyatdadır. 200 mini isə əlavə olaraq bölgələrdən daxil olur. Təbii ki, bu yükədə Bakı şəhərinin yol infrastrukturu tab gətirmir. Bu barədə ciddi şəkildə düşünmək lazımdır, kənar dairəvi yollar qurulmalı və nəqliyyat inkişaf etdirilməlidir”.