"İctimai nəqliyyat tam bərbad vəziyyətdədir" - NƏQLİYYAT EKSPERTİ AYDINLIQ GƏTİRDİ

"Tıxacların səbəbi məlumdur. Bu, Bakı şəhərinin alnına yazılıb. Çünki digər bölgələrdə hələ ki, sakitçilikdir". Bu sözləri SİA-ya açıqlamasında nəqliyyat eksperti Elməddin Muradlı deyib.

Onun sözlərinə görə, bölgələrdə tıxac yalnız istirahət mərkəzlərində və bəzi saatlarda olur: "Buna da turizm potensialı olan bölgələri misal göstərmək olar. Bu baxımdan sırf Bakı şəhəri üçün xüsusi nəqliyyat idarəetmə sistemi tətbiq edilməli, plan qurulmalıdır. Çünki plansız iş görülə bilməz. Belə olan halda müəyyən bir inkişafa nail ola bilərik.

Elməddin Muradlı sözlərinə belə davam edib: "Hal-hazırda bu işlər plansız şəkildə görülür. Kor-koranə şəkildə yanaşmalar var. Biz ictimai nəqliyyatın inkişafından danışırıq, amma çox təəssüflər olsun ki, BNA-nın dövründə müəyyən inkişafa nail olsaq da, sonradan çökmə baş verdi.

Bu gün ictimai nəqliyyat tam bərbad vəziyyətdədir. Metro şəbəkəsinin inkişafından danışırıq, amma bu sahədə də irəliləyişə nail olmamışıq. Bu da ictimai nəqliyyatın inkişafından danışdıqda bir problem kimi görünür.

Yol-nəqliyyat hadisələri də təbii ki, nəqliyyatın intensiv hərəkətindən irəli gəlir. Xüsusilə, taksi fəaliyyəti ilə məşğul olan sürücülər tərəfindən daha çox yol nəqliyyat hadisələri törədilir. İctimai nəqliyyat nə qədər güclü olsa, bu zaman avtomobillərin sayı azalacaq. Bu məsələlərə diqqət etmək lazımdır.

Bu gün araşdırma aparsaq görərik ki, avtomobil alanların 15-20 faizi məhz ictimai nəqliyyatın bərbad vəziyyətdə olmasına görə buna məcbur qalır. Parisdə cəmi 1500, Bakıda isə 60 min taksi var. Bu, bizim ictimai nəqliyyatın normal vəziyyətdə olmadığını göstərir".