Şagirdlərə ictimai nəqliyyat pulsuz ola bilərmi? - EKSPERTDƏN AÇIQLAMA

Deputat Naqif Həmzəyev Milli Məclisin bu gün keçirilən iclasında Bakıda tıxac probleminin həlli üçün şagirdlər və müəllimlərə ictimai nəqliyyatın pulsuz olması təklif edilib.

Məsələ ilə bağlı Tribunainfo.az- a danışan nəqliyyat eksperti Elməddin Muradlı bildirib ki, deputatın təklifi məntiqli və aktualdır:
“Əslində biz Rəqəmsal İnkişaf və Nəqliyyat Nazirliyi olaraq belə bir müzakirəmiz də olub. Düşünürəm ki, bu məsələ nə vaxtsa öz həllini tapacaq. İnanmıram, yaxın vaxtlarda həllini tapsın, ancaq vəziyyət o həddə çatıb ki, günün istənilən saatı tıxaca rast gəlmək mümkündür. O zaman çıxış yolu üçün müəyyən addımların atılmasına gərək var. Bunun bir mexanizmi olmalıdır. Biz nazirliklə məsələni bu şəkildə müzakirə etdik ki, Bakı-Sumqayıt yolunda tıxacın qarşısını almaq üçün həmin istiqamətdən istifadə edən tələbələrə kart verilsin. Çünki tələbələr bu yolda yalnız ictimai nəqliyyatdan yox, həm də qanunsuz fəaliyyət göstərən mikroavtobusların xidmətindən, taksilərdən istifadə edir ki, bu da yüklənməyə gətirib çıxarır. Apardığımız araşdırmalar zamanı belə məlum oldu ki, 501, 502, 503 nömrəli avtobuslar o yolda fəaliyyət göstərir. Onlar da cəmi beş avtobusdur. Belə olan halda təbii ki, minlərlə insan yolda qala bilər, onların da köməyinə taksilər gəlir. O baxımdan əlavə yükləmələr yaranır. İctimai nəqliyyat olduğu təqdirdə vəziyyət o həddə gəlib çatmayacaq. Biz başlanğıc üçün təklif etdik ki, bu, Bakı-Sumqayıt yolunda tətbiq olunsun. İstənilən halda deputatın təklifində məntiq var”.