Şəki DYP sürücü və piyadalara xəbərdarlıq etdi - FOTO

2022-ci il iyulun 21-də Şəki Şəhər-Rayon Polis Şöbəsinin Dövlət Yol Polis Bölməsi şəhər ərazisində növbəti təhlükəsizlik tədbiri keçirib. Hərəkət iştirakçıları saxlanılaraq xəbərdarlıq edilib və maarifləndirilib. Şəki Dövlət Yol Polis Bölməsi tərəfindən verilən məlumata əsasən, mütəmadi olaraq profilaktiki tədbirlər həyata keçirilir və bu tədbirlər müsbət nəticə verir. Belə ki, 2022-ci ilin 6 ayı ərzində xidməti ərazidə piyadaların təqsirindən heç bir yol-nəqliyyat hadisəsi baş verməyib. Cari ildə baş vermiş 6 yol-nəqliyyat hadisəsindən 3-ü (50%) piyadanın vurulması ilə nəticələnsə də, hər 3 hadisənin piyadanın yol hərəkəti qaydasını pozması nəticəsində baş vermədiyi müəyyən edilib. Eləcə də, 3 yol-nəqliyyat hadisəsindən 2-nin sürücülər tərəfindən nəqliyyat vasitəsinin yüksək sürətlə idarə edilməsi, 1-nin isə ictimai nəqliyyatın dayanacaqlarını keçmə qaydasının pozulması səbəbindən baş verdiyi bildirilib.

Dövlət Yol Polis Bölməsinin təbliğat və təşviqat üzrə inspektoru, polis baş leytenantı Tural Niftalıyev bildirib ki, Şəki turizm şəhəridir. Yay mövsümündə küçə və yollarda hərəkətin intensivliyinin yüksəlməsi səbəbindən bütün hərəkət iştirakçıları yol hərəkəti qaydalarına ciddi əməl etməlidirlər ki, arzuolunmaz hallar, yol nəqliyyat hadisələri baş verməsin. Piyadalar yolun hərəkəti hissəsini müəyyən olunmayan yerlərdən keçməsinlər, səkilərlə hərəkət etsinlər, piyada svetoforunun və ya nizamlayıcının işarələrinə riayət etsinlər. Sürücülər piyada keçidinə daxil olmuş piyadaya nəqliyyat vasitəsini saxlayaraq yol versinlər. Əks təqdirdə yol hərəkəti qaydalarını pozan hərəkət iştirakçıları barəsində Azərbaycan Respublikasının qanunvericiliyinə uyğun olaraq inzibati tənbeh tədbirləri görüləcəkdir.