Naxçıvana 50 km yolumuz olacaq - Zəngəzur dəhlizində SON VƏZİYYƏT - FOTOLAR

Zəngilanda olanda Zəngəzur dəhlizi və Ağbənddə İran üzərindən Naxçıvana rahat gedəcəyimiz yolla tanış oldum. Çox möhtəşəm işlər gedir, tunellər, yollar, yolötürücüləri tikilir. Ağırdır, amma iş gedir. Qarda-yağışda belə işləyirlər. Bu körpü İran üzərindən Naxçıvana yolumuzu daha da qısaldacaq. Cənab Prezident İlham Əliyev dünən yerli TV kanallara müsahibəsində bu barədə çox vacib məlumatları açıqlayıb.
- Bizim təşəbbüsümüzlə Ağbənd qəsəbəsində Arazın üzərindən körpü də inşa edilir. Yəni bizim o bölgədən Qərb və Cənub istiqamətinə əslində iki yolumuz olacaq. Biri Zəngəzur dəhlizi - Ermənistan üzərindən, biri isə Araz dəhlizi - İran üzərindən. Bunun da təşəbbüskarı biz olmuşuq. Körpünü biz öz vəsaitimizlə inşa edirik. Hazırda Azərbaycanın əsas hissəsindən Naxçıvana getmək üçün Biləsuvardan uzun yol qət edilməlidir. İndi isə İran ərazisindən Naxçıvana cəmi 45-50 kilometr gediş olacaq. Beləliklə, Azərbaycanın əsas hissəsi ilə Naxçıvan arasında iki bağlantı olacaq, biri Ermənistan üzərindən, biri isə İran üzərindən. Biz faktiki olaraq Naxçıvanı, Şərqi Zəngəzuru və Qarabağı bir bölgə kimi birləşdirəcəyik.
P.S. Adam bu işləri gördükdən sonra ölkəmizin qüdrəti ilə qürurlanır...

Elməddin Muradlı