Avtomobili iki və daha çox müxtəlif rəngə boyamaq barədə qanunvericilik nə deyir? - VİDEO

Son illərdə sürücülər arasında baş qaldıran avtomobillərini digərlərindən fərqləndirmə istəyi, yaxud insanların baxışlarını bir anda öz avtomobillərinə yönəltmə arzusu maşınlarını iki və daha çox rənglə dizayn etmələrinə gətirib çıxarır. Bu baxımdan seçilən avtomobillərə paytaxt küçələrində də rast gəlmək mümkündür. Bu yola baş vurmuş və etmək istəyən sürücülər isə qanunla nəzərdə tutulmuş halları gözə alaraq hərəkət etməlidir. 
Avtomobili iki və daha çox müxtəlif rəngə boyamaq barədə qanunvericilik nə deyir?
Avtosfer.az xəbər verir ki, avtomobilin rənglənməsi barədə qanunvericilkdə heç bir standart və norma müəyyən olunmayıb. Buna görə də sürücülər idarə etdikləri avtomobilləri müxtəlif rənglərə boyaya bilərlər. Lakin bu dəyişiklikdən sonra qeydiyyat şəhadətnaməsinə düzəlişlər edilməsi üçün avtomobil Dövlət Yol Polisi İdarəsinin Qeydiyyat-İmtahan şöbəsinə təqdim edilməlidir. Qanunvericiliyə görə iki müxtəlif rəngə boyanmış avtomobilin qeydiyyata alınmasından imtina edilə bilməz. Bu dəyişikliyin qeydiyyata alınması üçün 25 manat avtomobilin qeydiyyat şəhadətnaməsinə, 30 manat isə texniki müayinəyə görə dövlət rüsumu ödənilməlidir.

Nərmin Əkbər