Birtərəfli yolda əks saxlayan sürücü avtomobilləri çaşdırdı - VİDEO

Dəfələrlə xəbərdarlıq olunmasına baxmayaraq dayanma-durma qaydalarına məhəl qoymayan sürücülər getdikcə çoxalır və artıq piyada səkisi ilə kifayətlənməyib birbaşa avtomobil yolunda saxlayanlar da artıb. Elə paylaşdığımız video da məhz bu mövzunu işıqlandırır. 
Avtosfer.az xəbər verir ki, həvəskar kamerasına düşən görüntülərdən aydın olduğu kimi yolun ortasında saxlayan maşın sürücülərin hərəkətinə mane yaradıb. Paytaxtın mərkəzi küçələrindən birində cərəyan edən videoya diqqət etsək görərik ki, dayanma-durma qaydasına məhəl qoymayan sürücü birtərəfli yola əks istiqamətdə dayanıb. Avtomobilinin işıqlarını yandıraraq sükan arxasında olduğuna işarə edən şəxs bir neçə dəqiqə burada dayanaraq  maşınların yolunu kəsib və onlar məcbur digər zolağa keçərək davam etmək məcburiyyətində qalıblar. Eyni anda iki qayda pozuntusuna əl atan sürücüyə bildirək ki, dayanma-durmanı pozduğu üçün İnzibati Xətalar Məcəlləsinin 346-cı maddəsinə görə 20 manat, həmçinin birtərəfli yolun əks istiqamətinə çıxdığı üçün 327.4 maddəsinə əsasən, 4 bal, 100 manat cərimə ödəməlidir. 

Nərmin Əkbər