“Lapatka” ilə avtomobillərə hücum edib 5 maşına ziyan vurdu – Cinayət işi açıldı - VİDEO

Polis yol işçilərinə və yoldan keçən avtomobillərə bellə hücum edən sərxoş sürücünü saxlayıb. Avtosfer.az xəbər verir ki, Rusiyanın Tver vilayətində baş verən hadisə həvəskar kamera tərəfindən qeydə alınıb.

Məlumata görə, M-9 "Baltiya" magistral yolunun 215-ci kilometrliyində sərxoş vəziyyətdə olan krossover sürücüsü idarəetməni itirərək yol kənarındakı maneəyə çırpılıb. Qəzada yaxınlıqda çalışan yol işçilərini günahlandıran sürücü aqressivləşərək onların üzərinə hücum çəkib.

Əlinə bel götürən şəxs əvvəlcə işçilərə məxsus mikroavtobusun bütün şüşələrini sındırıb. Bununla da sakitləşməyən sürücü yola qaçaraq aləti hərəkətdə olan digər avtomobillərə tərəf atmağa başlayıb.

Xoşbəxtlikdən insident zamanı xəsarət alan olmayıb, lakin yoldan keçən 5 avtomobilə ciddi ziyan dəyib.

Hadisə yerinə gələn polis əməkdaşları xuliqanı tərksilah edərək saxlayıblar. Hazırda o, müvəqqəti saxlama təcridxanasına salınıb. Araşdırmalar zamanı məlum olub ki, həmin şəxs əvvəllər də məhkum olunub. Faktla bağlı həmin şəxs barəsində "Xuliqanlıq" maddəsi ilə cinayət işi açılıb.

Sözügedən hadisənin anbaan videosunu təqdim edirik:

Namiq Musayev