Salyan postuna çatmamış sürücülər “qayda pozur” - SƏBƏB nədir? - VİDEO

Bu yol həmişə sürücüləri tələyə salır: ya cərimə yeyirlər, ya da maşınlarından olurlar.

Avtosfer.az xəbər verir ki, şikayətçi kamerası ilə çəkilən görüntülər Ələt-Astara magistral yolunda qeydə alınıb. Videodan da göründüyü kimi Salyan postuna 200 metrlik məsafədən başlayaraq yola sonradan əlavə olunmuş “yamaqlı asfalt” nahamarlıq yaradaraq bu istiqamətdə hərəkət edən nəqliyyat vasitələrinə ciddi zərər vurur. Çıxış yolu kimi həmən əraziyə çatan sürücülər yol hərəkəti qaydalarına zidd olaraq magistral yolun sağ tərəfi boş olsa belə sol zolağa keçmək məcburiyyətində qalırlar.

Belə olduğu zaman, haqlı olaraq yol polisinin cəriməsinə məruz qalan sürücülərin şikayətləri havada qalmağa davam edir. Belə görünür ki, mövcud vəziyyətin yaranma səbəbkarı - Azərbaycan Avtomobil Yolları Dövlət Agentliyi (AAYDA) isə çıxış yolu tapmır. AAYDA-dan fərqli olaraq, biz üzərimizə düşən öhdəliyi yerinə yetirərək vətəndaş sürücülərin timsalında şikayətiçinin videosunu işıqlandırdıq və ictimailəşmiş görüntünün tez zamanda quruma təsir edəcəyinə ümid edirik.

Nərmin Əkbər