Velosipedi bu cür daşıyan sürücüləri hansı cəza gözləyir?

Avtomobillə gəzintiyə gedən sürücülər bəzən velosipedlərini də özləri ilə aparırlar. Avtomobilin yük yeri velosiped üçün kifayət etmədiyindən onu xüsusi qurğu ilə bana bərkidərək aparırlar. Sedan tipli avtomobillərdə həmin qurğu ilə daşınan velosiped bəzi hallarda işıq cihazlarının və ya qeydiyyat nişanının üzərini tutur.

Belə halla qarşılaşan bir neçə sürücü qeydiyyat nişanının üzərini örtən velosipedə görə 500 manat məbləğində cərimə olunduğunu iddia edir. Bunun nə dərəcədə qanuni olub-olmadığı isə sürücülərə qaranlıq qalıb.

Qeydiyyat nişanının üzəri bu cür bağlanarsa sürücünü hansı məsuliyyət gözləyir?

Avtosfer.az bildirir ki, İnzibati Xətalar Məcəlləsinin 342.9-cu maddəsinə əsasən qeydiyyat nişanının görünüşünü çətinləşdirən örtüklərdən istifadə edən sürücü 500 manatdan 800 manatək cərimə oluna bilər. Lakin velosipedin daşınması zamanı qeydiyyat nişanının görünməsi məhdudlaşarsa 500 manat cərimədən söhbət gedə bilməz. Çünki "Yol hərəkəti haqqında" qanunun 57-ci maddəsinin III hissəsinin 4-cü bəndində qeyd olunub ki, "daşınan yük xarici işıq siqnallarının və işıqqaytarıcıların, qeydiyyat və tanınma nişanlarının üstünü
tutmamalıdır".
Bu maddənin tələbinin pozulması isə İnzibati Xətalar Məcəlləsinin 342.9-cu maddəsiylə deyil, 327.1-ci maddəsiylə inzibati məsuliyyət yaradır. Bir sözlə velosipedin bu cür daşınması yük daşıma qaydalarının pozulması kimi qeydə alınaraq sürücüyə maksimum 40 manat cərimə yazıla bilər.

Təbriz Yusubov