Yollarda maşınlar arasında ara məsafəsi nə qədər olmalıdır? - CAVAB

Hərəkətdə olan nəqliyyat vasitələri arasında saxlanılmalı olan ara məsafəsi nə qədər olmalıdır?Aparılan müşahidələr göstərir ki, qəzaların başvermə səbəblərindən biri də, yollarda avtomobillər arasında ara məsafəsinin düzgün seçilməməsidir. Məsafə düzgün götürülmədiyi halda hətta ölümlə nəticələnən zəncirvari qəzalar da baş verə bilər. Məhz bu problemlə əlaqədar Baş Dövlət Yol Polisi İdarəsi ötən gün sürücülərə müraciət edib. Müraciətdə sürücülərdən xahiş olunub ki, yollarda avtomobillər arasındakı məsafəyə diqqət yetirilsin.

Bu məsələdə əksəriyyəti maraqlandıran məqam isə tələb olunan ara məsafəsinin necə tənzimlənməsidir.

Bununla bağlı Lent.az-a danışan BDYP-nin şöbə rəisi, polis polkovnik-leytenantı Namidan Piriyev bildirib ki, qanunvericilikdə konkret olaraq ara məsafəsi üçün rəqəm göstərilməyib: “Avtomobillər arasındakı məsafə ilə bağlı qanunvericilikdə konkret olaraq, tələb edilən rəqəm yazılmayıb. Amma sürücülər özləri müəyyən etməlidir ki, qəfil tormozlama zamanı qarşıdakı nəqliyyat vasitəsi ilə qəza yaranmasın. Bu məsafə yollardakı sürət həddi ilə birbaşa əlaqəlidir. Təbii ki, yüksək sürət zamanı tormozlama zonası uzun olur. Buna görə də, sürətli yollarda ara məsafəsi daha çox götürülməlidir”.///lent.az