Avtotəmir məntəqələri səkiləri zəbt edir: Piyadalar yolla hərəkət etməli olur – FOTO

Sürücülərin piyadalara qarşı saymazyana münasibəti Bakının müxtəlif ərazilərində davam edir

Avtosfer.az xəbər verir ki, analoji hal paytaxtın Nizami rayonunda da müşahidə olunur.

Rayonun Elşən Süleymanov küçəsində yerləşən avtomobil təmiri və təkər-balans məntəqəsinin qarşısında, səkidə dayanan avtomobillər piyadaların rahat hərəkətinə mane olur. Səkidə nəqliyyat vasitəsini park edən sürücülərin qaydaları kobud şəkildə pozması nəticəsində piyadalar məcburiyyətdən avtomobillərin hərəkət etdiyi yola düşməyə məcbur olurlar. Bu, həm piyadaların təhlükəsizliyini, həm də yol hərəkətinin təhlükəsizliyini ciddi şəkildə təhdid edir.

Belə ki, 99-OK-011 qeydiyyat nişanlı “BMW” və 77-SE-159 nömrəli “Hyundai” markalı avtomobillər fotodan da göründüyü kimi səkini zəbt etdiyinə görə piyadalar hərəkət etməkdə çətinlik çəkir. Sakinlər belə təmir məntəqələrinin səki zəbtinin qarşısını almasının aidiyyəti qurumlardan xahiş edir. Qeyd edək ki, qaydaları bu cür pozan sürücülər İnzibati Xətalar Məcəlləsinin 346.9-cu maddəsi ilə 60 manat və əlavə olaraq 2 balla cərimələnir.

Eltac Zülfüqaroğlu