Azadlıq prospektində taksi sürücüləri 5 ildir yolayrıcını zəbt edir - FOTO

Bakının bir sıra küçə və prospektlərində hər gün sürücülər tərəfindən bir çox qaydalar pozulur. Bununla əlaqədar istər yol polisinin, istərsə də digər aidiyyəti qurumların çağırışları heçə sayılır. Nəticədə həm piyadaların, həm də qaydalarla avtomobil idarə edən başqa sürücülərin hüquqları tapdanır, hərəkətlərinə çətinlik yaradılır.

Avtosfer.az xəbər verir ki, belə faktların tez-tez rast gəlindiyi ərazilərdən biri də Nəsimi rayonudur. Rayonun Azadlıq prospektində sürücülər avtomobillərini hara gəldi park edir, hətta yolun ortasında maşını saxlayıb “2 dəqiqəyə marketə dəyib gəlir”. Sonra da sosial şəbəkələrdə video yayırlar ki, filan yerdə saxlamışdım cərimə gəldi. Hər sürücü də səbəb olaraq sərnişin gözlədiyini, aptekə, yaxud marketə girdiyini göstərir.

Prospektin Mirəsədulla Mirqasımov küçəsilə kəsişməsində taksi sürücüləri avtomobillərini yolayrıcında, eləcə də piyada keçidinin üstündə saxlayır. Artıq 5 ildən çoxdur təkrarlanan bu qayda pozuntusu piyadalar üçün çətinlik yaradır. Mirəsədulla Mirqasımov küçəsindən prospektə dönən sürücülər piyadaları görmür və nəticədə ağır yol-nəqliyyat hadisələri baş verir.

Ərazidə yaşayan sakinlər və tez-tez bu piyada keçidindən istifadə edənlər aidiyyəti qurumların vəziyyəti nəzarətə götürməsini tələb edir.

Səfər