Bu yoldan sola dönmək qadağan edildi: Sürücülərin diqqətinə! - VİDEO

Bakıda hərəkətin təşkilinə edilmiş dəyişiklikdən əksər sürücülər hələ də xəbərsizdir. Avtosfer.az xəbər verir ki, söhbət paytaxtın Bakıxanov küçəsilə Səməd Vurğun küçəsinin kəsişməsindən gedir. Belə ki, sürücülər əvvəllər bu kəsişmədən sola dönərək Səməd Vurğun küçəsi istiqamətində hərəkət edirdilər.
Lakin edilmiş sonuncu dəyişiklikdən sonra kəsişmə yerinə hərəkətin düzünə məcburiliyini bildirən nişan quraşdırılıb. Bu nişana əhəmiyyət verməyən sürücülərin hərəkəti kameraya düşüb.
Qeydə alınmış videodan da aydın şəkildə görünür ki, 77-SE-310 qeydiyyat nişanlı "Deepal" markalı və 10-AM-007 qeydiyyat nişanlı "Land Rover" markalı avtomobilin sürücüləri düzünə hərəkəti bildirən nişana əhəmiyyət vermədən sola dönüblər.
Sürücülər məcburi hərəkət istiqaməti nişanının kəsişmə yerlərində bitdiyini əsas götürərək sola dönürlər. Lakin qanunvericilikdə qeyd olunan müddəadan xəbərsizdilər.
"Yol hərəkəti haqqında" qanunun 65-ci maddəsində qeyd olunub ki, məcburi hərəkət istiqaməti nişanlarının qüvvəsi qarşısında nişan qoyulmuş yolun hərəkət hissəsinin kəsişmə yerinə şamil edilir. Bu o deməkdir ki, kəsişmə yerində əlavə məcburedici nişan varsa sürücü onun tələblərinə uyğun hərəkət etməlidir. Təqdim etdiyimiz videogörüntüdən də aydın şəkildə görünür ki, Bakıxanov küçəsindəki kəsişmə yerində düzünə hərəkəti bildirən əlavə nişan quraşdırılıb. Bu səbəbdən həmin yolayrıcından sola dönmək qadağandır.
Bu qayda pozuntusuna yol verən sürücülər İnzibati Xətalar Məcəlləsinin 327.1-ci maddəsilə 40 manat məbləğində cərimə oluna bilərlər.

Fərid