Maşına cürbəcür işıq cihazları quraşdırıb kefi istəyəndə nömrəsiz sürən SÜRÜCÜ CƏRİMƏLƏNDİ - VİDEO - YENİLƏNİB

DİN-in Mətbuat Xidmətinin Gəncə regional qrupundan Avtosfer.az-ın sorğusuna cavab olaraq bildirib ki, görüntülər Gəncə Şəhər Baş Polis İdarəsinin Dövlət Yol Polisi Şöbəsinin əməkdaşları tərəfindən araşdırılıb və qayda pozan sürücü - S. Hüseynov inzibati məsuliyyətə cəlb olunub.

***

15:30

***

Gəncədə kobud qayda pozan sürücünün görüntüləri sosial şəbəkədə paylaşılıb.

Avtosfer.az-ın məlumatına görə, 20-EZ-380 dövlət nömrə nişanlı, “VAZ-2107” markalı avtomobilin sürücüsü qadağan olunmuş sayrışan işıq cihazlarından istifadə edib. Görüntüdən aydın olduğu kimi, o, maşının alın şüşəsinə göy və qırmızı rəngdə sayrışan işıq siqnalları quraşdırıb. Digər kadrda isə o, nəqliyyat  vasitəsinə müxtəlif işıq cihazları taxıb və normativ tələbləri pozaraq maşının arxa işıqlarını yanıb-sönən rejimə keçirib. Eyni zamanda sürücü avtomobilin konstruksiyasına müdaxilə edib və dövlət nömrə nişanı olmadan sürüb. 

Qeyd edək ki, maşının konstruksiyasına edilən bütün müdaxilələr təhlükəsizliyə birbaşa xətər yetirə bilər. Öz zövqünə uyğun işıq cihazlarının nəqliyyat vasitəsinə quraşdırılması qanunla qadağandır. İnzibati Xətalar Məcəlləsinin 342.9-cu maddəsinə əsasən, nəqliyyat vasitələrinin müvafiq icazə olmadan sayrışan işıq siqnallarından istifadə edilməsinə görə 500 manatdan 800 manatadək məbləğdə cərimə nəzərdə tutulub.

Nərmin