Maşınların səkiləri zəbt etməsinin qarşısı necə alınmalıdır? – UKRAYNA NÜMUNƏSİ - FOTO

Ölkəmizdə qeydiyyatdan ekçən, ölkəmizə yeni gətirilən avtomobillərin sayında artım müşahidə edilir. Statistikaya əsasən, Azərbaycanda 1 milyon 950 mindən çox avtomobil qeydiyyatdan keçib. Bununla yanaşı hər il təxminən 100 min avtomobil gömrükdən ölkəmizə keçirilir. Bütün bu artım iri şəhərlərdə, xüsusən də Bakıda sıxlığın artmasına səbəb olur. Yaranan sıxlıq isə özü ilə paralel başqa problemlərə gətirib çıxarır.

Avtosfer.az xəbər verir ki, ölkədə, xüsusən paytaxt Bakıda avtomobillərin sayındakı artımın yaratdığı problemlər özünü parklanma zamanı göstərir.

Belə ki, şəhərin bir sıra küçə və prospektlərində hələ də bəzi sürücülər avtomobilləri saxlamağa yer tapmadıqları üçün səkiyə dırmaşdırırlar. Ya bütövlükdə səkini zəbt edirlər, ya da 1-2 təkərini səkiyə qaldıraraq maşınlarını təhlükədən qoruyurlar. Lakin bu zaman da piyadaların səkidə rahat hərəkətinə mane olurlar.

Analoji hal təkcə Azərbaycanda yox, elə Avropada da mövcuddur. Bu baxımdan bu gün bir sıra Avropa ölkələri bu problemin həlli istiqamətində müxtəlif işlər görür.

Məsələn Ukrayna bu gün Rusiya ilə müharibə şəraitində olsa da, dövlət şəhərlərdə piyadalar üçün hərəkətin əlçatanlığını təmin etmək məqsədilə yeniliklər edir. Şəkillərdəki küçələr Dnepr şəhərində yerləşir. Əvvəllər sürücülər maşınları səkidə park edirdi. Şəhərdə aparılan yeniliklərdən sonra artıq Dnepr daha gözəl görünür. Lazımsız pillələri yığışdırıb baryersiz mühit yaradırlar. Piyada keçidlərini daha əlçatan edirlər, səkiləri hərəkət hissəsinin hesabına genişləndirirlər, örtüyü asfalt əvəzinə daha dözümlü daşla əvəz edirlər, küçəyə yaşıllıq əlavə edərək həm də daha gözəl görünüş əldə edirlər.

Mütəxəssislər bildirir ki, bu üsullar şəhərsalma mədəniyyətində çox effektivdir və bir sıra inkişaf etmiş ölkələrin sınadığı təcrübələrdir. Parisdə də 2 il əvvəl şəhərin mərkəzi küçələrində eyni üsulla avtomobillərin hərəkət etdiyi ərazilər məhdudlaşdırılmışdı və piyadayönümlü meydan halına gətirilmişdi.

Səfər