Nərimanovda bir-birilərinə “tırka” verən motosikletçilər səkini yola çevirdilər - VİDEO

Paytaxtın Nərimanov rayonu, Əhməd Rəcəbli küçəsində qayda pozan sürücülər özlərini videoya çəkərək sosial şəbəkədə paylaşıblar.

Avtosfer.az-ın məlumatına görə, hadisə bir neçə gün əvvəl səhər saatlarında qeydə alınıb. Kadrlardan görünür ki, 99-E-625 dövlət nömrə nişanlı “Tufan” markalı, 99-X-819 nömrəli “CFMoto” markalı və dövlət nömrə nişanı olmayan motosiklet sürücüləri piyadalar üçün ayrılmış səki ilə hərəkət ediblər.

Belə ki, öncə tıxacda dayanmaq istəməyən motosikletçilərdən biri səkiyə çıxaraq hərəkət edir. Bunu görən digər sürücü həmkarına “Qardaşım yolunu tapdı” deyə səslənir. O isə cavabında “Bacarırsan, sən də et” deyir. Əvvəlcə tərəddüd edən sürücü daha sonra səkidə hərəkət edir. Ardınca görüntünü qeydə alan üçüncü motosikletçi də eyni qayda pozuntusuna yol verir.

Qanunvericiliyə əsasən, səkilər yalnız piyadaların hərəkəti üçün nəzərdə tutulub. Motosiklet və ya moped kimi mexaniki nəqliyyat vasitələrinin səkidə idarə olunması inzibati qaydada cərimə ilə nəticələnir və piyadaların həyatını risk altına salır.

Unutmayaq ki, yol nəqliyyat vasitələri, səki isə insanlar üçündür. Qısa yol seçmək və ya vaxta qənaət məqsədilə qaydaları pozmaq bir anlıq rahatlıq versə də, ağır nəticələrə gətirib çıxara bilər.

Nərmin