Stop xətdə dayanmayan xanım sürücü “zebra”da piyadaya siqnal verib tələsdirdi - VİDEO

Yasamalda sürücünün qayda pozuntusu ərazidən keçən piyadalar və sürücülər tərəfindn birmənalı qarşılanmayıb.
Avtosfer.az xəbər verir ki, bu gün Yasamal rayonu Bəsti Bağırova küçəsindəki işıqforda yol hərəkəti qaydalarının pozulması halı müşahidə edilib.
Belə ki, 99-DZ-309 dövlət qeydiyyat nişanlı “Ford” markalı avtomobilin sürücüsü piyada keçidinin qarşısındakı stop-xətti keçərək, piyada keçidinə yaxın hissədə dayanıb. Digər nəqliyyat vasitəsi avtomobil üçün yer imkanı yaratsa da, sürücü yenə də avtomobilini geri çəkməyib.
Daha sonra işıqforda yaşıl işıq yandığı zaman dönmə əməliyyatı edən həmin sürücü piyada keçiddən istifadə edən vətəndaşa siqnal verərək onu tələsdirib və hərəkəti davam etdirib.
Qeyd edək ki, bu kimi hallar yol hərəkəti qaydalarına laqeyd münasibətdən və sürücü tələskənliyindən qaynaqlanır. Sürücüləri və piyadaları hərəkət zamanı daha diqqətli olmağa, qaydalara ciddi riayət etməyə, belə hallar nəticəsində baş verə biləcək yol-nəqliyyat hadisələrinin qarşısı almağa çağırırıq.

Fidan