Xətai yol polisi təhlükə yaradan moped sürücüsünü CƏZALANDIRDI - VİDEO

Xətai rayonunda kobud qayda pozuntularına yol verərək digər hərəkət iştirakçıları üçün təhlükə yaradan moped sürücüsü saxlanılıb. Avtosfer.az-ın məlumatına görə, Xətai Rayon Polis İdarəsinin Dövlət Yol Polisi Şöbəsinin əməkdaşları tərəfindən aparılan araşdırmalar nəticəsində həmin sürücünün Sabirabad rayon sakini İmanzadə Ümüd Qafil oğlu olduğu müəyyən edilib. Sürücü barəsində İnzibati Xətalar Məcəlləsinin 327.2, 327.4 və 332.2-ci maddələri ilə inzibati protokol tərtib olunub.

Qeyd edək ki, sürücü azyaşlıdır və onun sürücülük hüququ yoxdur. Mopedin də dövlət qeydiyyatı aparılmayıb. Buna görə də müvvəqəti mühafizə olunan duracağa yerləşdirilib.

*** 4 iyun, 14:00

Paytaxtın Xətai rayonu, Telnov Sarayevo küçəsində yol hərəkəti qaydalarını kobud şəkildə pozan moped sürücüsü kameraya düşüb.

Avtosfer.az-ın məlumatına görə, hadisə iyunun 3-də saat 22:38 radələrində qeydə alınıb. Görüntülərdən aydın olur ki, moped idarə edən gənc işıqforun qadağanedici qırmızı işığında hərəkəti davam etdirərək yolayrıcına daxil olub. Bununla da kifayətlənməyən sürücü daha sonra əks istiqamətli hərəkət zolağına çıxaraq qarşıdan gələn avtomobil üçün qəza şəraiti yaradıb.

Kadrlarda moped sürücüsünün son anda dayanaraq toqquşmadan yayınması əks olunub. Bir neçə saniyəlik gecikmə isə ağır yol-nəqliyyat hadisəsi ilə nəticələnə bilərdi.

Qeyd edək ki, xüsusilə gecə saatlarında işıqforun tələblərinə əməl edilməməsi və əks yola çıxmaq kimi təhlükəli manevrlər sürücülərin reaksiyasını məhdudlaşdırır, qəza riskini isə dəfələrlə artırır.

Nərmin