Xocəsəndə piyadaların həyatını təhlükəyə atan sürücü CƏZALANDIRILDI - VİDEO - YENİLƏNİB

"Bu gün səhər saatlarında Xocəsən qəsəbəsində kobud qayda pozuntusuna yol verən sürücü cəzalandırılıb".

Bunu Baş Dövlət Yol Polisi İdarəsinin (BDYPİ) rəsmisi polis polkovnik-leytenantı Mübariz Ağayev verib.

"Kobud qayda pozuntusuna yol verməklə inzibati xəta törədən sürücü Xəyal Mövsüm oğlu Mehdiyev, Azərbaycan Respublikası İnzibati Xətalar Məcəlləsinin (İXM) müvafiq maddəsinə əsasən inzibati cərimə növündə məsuliyyətə cəlb olunub.

Baş Dövlət Yol Polisi İdarəsi bir daha sürücülərə müraciət edərək bu kimi halların yolverilməz olduğunu və sürücü intizamının möhkəmləndirilməsi istiqamətində, ictimaiyyətlə birgə, zəruri tədbirlərin aparılacağını diqqətə çatdırır", - deyə M. Ağayev vurğulayıb.

***14:53

Yol hərəkəti qaydalarını kobud şəkildə pozan sürücü piyadaların həyatını təhlükə altına atıb.

Avtosfer.az oxu.az-a istinadən xəbər verir ki, hadisə bu gün səhər Xocəsən yolunda baş verib.

Tıxacda qalmaq istəməyən 90-KZ-545 dövlət nömrə nişanlı "Ford Tranzit" markalı avtomobilin sürücüsü ötmə qaydalarına zidd olaraq, qarşıda gedən nəqliyyat vasitələrini sağ tərəfdən keçməyə qərar verib və piyadalarla dolu səkinin üstü ilə hərəkətini davam etdirib.

Baş Dövlət Yol Polisi İdarəsinin (BDYPİ) rəsmisi polis polkovnik-leytenantı Mübariz Ağayev hadisədən xəbərdar olduqlarını bildirib:

"Yol verilmiş inzibati xəta ilə bağlı araşdırma başlanılıb. Qanunamüvafiq tədbir görülərək, ictimaiyyətə əlavə məlumat veriləcək", - deyə M.Ağayev bildirib.