Sürücülərin çaşbaş qaldığı küçəyə nişanlar quraşdırıldı - Əməl edənlər CƏRİMƏLƏNMƏYƏCƏK - FOTO

Paytaxtın 28 May küçəsində quraşdırılan yeni yol nişanları sürücülər arasındakı çaşqınlığı aradan qaldırıb.

Bu barədə izləyicilərdən biri Avtosfer.az-ın “Whatsapp” ünvanına fotoşəkillər göndərib. Belə ki, sözügedən küçədə sağ və orta zolaqda çəkilmiş ox işarəsi ancaq sağa, sol zolaqdakı ox isə düzünə və sağa hərəkətə icazə verir. Lakin ərazidə 1.18 nişanlanma xəttiylə yanaşı labüd nişanının (5.8.1 nişanı) olmaması yolayırıcına çatan, xüsusilə tıxac zamanı əksər sürücülərin düzgün zolaqda yerləşməmələrinə və cərimələnmələrinə gətirib çıxarırdı.

Məsələylə bağlı Azərbaycan Yerüstü Nəqliyyat Agentliyi lazımi tədbiri görüb. Artıq küçədə 5.8.1 nişanı təşkil olunub. Nəticədə sürücülər vaxtından əvvəl hansı zolaqda yerləşməli olduqlarını görürlər.

Qeyd edək ki, mövcud problemlə bağlı bir neçə gün öncə saytımızda xəbər dərc olunmuşdu. 

Nərmin