Yol nişanı yararsız hala düşdü: Axşamlar bu ərazidə qəza şəraiti yaranır - FOTO

Paytaxtda minlərlə vətəndaşın yaşadığı küçədə piyada keçidinin təşkilində problem yaşanıb.

Avtosfer.az xəbər verir ki, Bakının Nizami rayonunda quraşdırılan piyada keçidi nişanının nasaz vəziyyətdə olmasa həm sürücülər, həm də piyadalar üçün çətinlik yaradıb.

Belə ki, Elşən Süleymanov küçəsindəki yol nişanının üzərindəki lövhə bir neçə gün əvvəl yararsız vəziyyətə düşüb. Nişanın təmir və ya bərpası ilə bağlı işlər gecikdiyi üçün sakinlər axşam saatlarında yaşadıqları binalara yaxınlaşmaqda problemlərlə qarşılaşıblar. Onlar küçənin bu hissəsindəki zebranın uzun müddətdir silinməsi bir yana, yol nişanının nasazlığı səbəbilə sürücülərin piyadalara yol verməməsindən şikayətləniblər.

Sakinlər problemin aidiyyəti qurumlar tərəfindən təcili şəkildə həll edilməsini gözlədiklərini deyib.

Səfər