Bakının bu küçəsində yaranan xaosu necə aradan qaldırmaq olar? - VİDEO

Paytaxtın Yusif Səfərov küçəsi ilə Üzeyir Hacıbəyov küçəsinin kəsişməsində (Cavanşir körpüsündə) sürücülər qayda pozmağa məcbur olur. Altı zolaqdan ibarət olan Y.Səfərov küçəsinin bütün zolaqlarından yalnız sağa hərəkət təşkil olunduğu üçün sürücülər mövcud hərəkətin təşkilinə görə sağa dönərkən qanunvericiliyin tələbini pozmalı olurlar. "Yol hərəkəti haqqında" qanunun 42-ci maddəsinin VII hissəsində qeyd olunub ki, nəqliyyat vasitəsi sağa dönərkən hərəkət hissəsinin mümkün qədər sağ kənarına yaxın hərəkət etməlidir. Qeyd etdiyimiz küçədən sağa- Cavanşir körpüsü istiqamətinə hərəkət edən sürücülər qanunun bu tələbinə görə ən sağ zolağa daxil olmalıdır. Lakin qanunun bu müddəasını əsas götürüb qaydalar çərçivəsində hərəkət etdikdə yolda xaos və təhlükə yaranır.

Bu cür mürəkkəb hərəkət trayektoriyası olan küçələrdə nəqliyyat vasitələrinin hərəkətini kanallaşdırmaq üçün qanunvericilikdə 1.7 nişanlanma xətti nəzərdə tutulub. Həmin nişanlanma xətti yolayrıcının hüdudlarında hərəkət zolaqlarını və trayektoriyanı göstərir. Bu nişanlanma xətti ilə nəqliyyat vasitələrinin trayektoriyalarını müəyyən edib sürücülərin rahat hərəkətini təmin etmək olar.

Ümid edik ki, hərəkətin təşkili ilə məşğul olan səlahiyyətli qurum qeyd olunan ərazini 1.7 nişanlanma xətti ilə təmin edəcək.

Təbriz Yusubov