“20 Yanvar” dairəsində 4 zolaqdan 3-nü zəbt edib bağladılar – Tıxac yaradanlar - VİDEO
Bakının ən problemli nəqliyyat qovşaqlarından biri “20 Yanvar” dairəsidir. Burada hərəkətin normal tənzimlənməsi üçün müxtəlif üsullar tətbiq olunsa da, heç biri effekt verməyib. Avtosfer.az xəbər verir ki, ərazidə ilk növbədə körpü tikildi, sonra svetofor qoyuldu, ardınca ərazidə piyadaların xaotik hərəkətinin qarşısını almaq üçün dəmir məhəccərlər qoyuldu. Lakin problem yenə də həll olunmur. “20 Yanvar” dairəsi artıq günün istənilən saatında tıxac və xaos müşahidə olunan ərazisinə çevrilib. Əsasən də Sumqayıt avtobusları və manatlıq taksilərin işğal etdiyi ərazidə normal hərəkət mümkün deyil.
Oxuculardan birinin Avtosfer.az-a göndərdiyi videodan aydın olur ki, Tbilisi prospektindən dairəyə daxil olan yolda 4 zolaq olsa da, onlardan 3-ü Sumqayıt avtobusları tərəfindən zəbt edilib. Yalnız 1 zolaq və orta zolağın yarısının hesabına maşınlar iki cərgədə güclə hərəkət edir. Vəziyyət o həddə çatıb ki, dairədə sağa daimi yaşıl işıq yansa da, taksilərin zəbt etdiyi həmin sağ zolaqdan dönmək mümkün deyil. Sürücülər məcburən svetoforun ümumi siqnalının yaşıl bölməsi yananda sağa gedə bilirlər.
Ümid edirik ki, aidiyyati qurumlar “20 Yanvar”da vəziyyəti nəzarətə götürüb qaydaları bərpa edəcək.
Elməddin