Bir milyon manatlıq maşınla qəzaya düşdü - Sürət həddini aşıbmış - VİDEO

“Ferrari” dilerinin işçisi təxminən 1 milyon manat dəyəri olan avtomobillə qəza törədib.

Avtosfer.az xarici mediaya istinadən xəbər verir ki, Braziliyanın San-Paulo şəhərində baş verən hadisənin görüntüləri binanın təhlükəsizlik kamerası tərəfindən qeydə alınıb.

Kadrlarda sarı rəngli avtomobilin sürətlə hərəkətdə olduğu və anidən sürücünün idarəetməsindən çıxaraq binaya çırpıldığı görülür.

Videoda qəzadan sonra avtomobilin ön hissəsinin yararsız vəziyyətə düşdüyü, eləcə də sürücünün köməyinə bir-neçə nəfərin qaçdığı və onu avtomobildən sağ-salamat çıxardığı da əks olunub.

Yerli xəbər portallarının yaydığı məlumata görə, qəzanı “Ferrari” dilerinin gənc işçisi törədib. O, sürət həddini aşaraq anidən sükan idarəetməsini itirib və hadisə baş verib.

Həmçinin qeyd edilir ki, “Ferrari 296 GTB” modelinin bazar qiyməti 980 min manadır.

Sözügedən hadisənin görüntülərini təqdim edirik:

Namiq Musayev