"Deputat" maşınıdır deyib "Porsche"ni polislərin üstünə sürən sürücü aradan çıxdı - VİDEO

Polis əməkdaşlarına "Bilirsənmi mən kiməm? Bu, millət vəkilinin maşınıdır" - deyərək avtomobili onların üzərinə sürən şəxs kameralara düşüb. Avtosfer.az xəbər verir ki, Türkiyənin İstanbul şəhərində baş verən hadisənin görüntüləri sosial şəbəkələrdə paylaşılıb.

Belə ki, Güngören rayonunda polis əməkdaşları şəhərsalma işləri ilə əlaqədar yolu bağlayaraq təhlükəsizlik tədbirləri görüb və nəqliyyat vasitələrini alternativ yollara yönəldiblər. Bu arada “Porsche” markalı avtomobili ilə bağlı yoldan keçməyə çalışan şəxs polislərlə mübahisə edib. Yoldan istifadə etməkdə israrlı olan sürücü "Bilirsənmi mən kiməm? Bu, millət vəkilinin maşınıdır" - deyərək polis əməkdaşlarını hədələyib. Yoldan keçə bilməyəcəyini başa düşən sürücü əsəbiləşərək avtomobilinə minib və onu mobil telefon vasitəsi ilə çəkən polis əməkdaşlarının üzərinə sürərək oradan qaçıb.

Polis əməkdaşları avtomobilin nömrəsini qeyd edərək sürücü haqqında şikayət ediblər. Araşdırma zamanı avtomobilin heç bir deputatın qeydiyyatında olmadığı müəyyən edilib.

Hazırda sürücünün tutulması istiqamətində tədbirlər görülür.

Sözügedən hadisənin videosunu təqdim edirik:

Namiq Musayev